الشاعرة ميسون نعيم الرومي تكتبُ بقلمها: حـِنـَّة عـرس  

الشاعرة ميسون نعيم الرومي تكتبُ بقلمها: حـِنـَّة عـرس   

 

عطشانه السواجي اسگيهه مي العين

من روحي نبع يضوي على الشطين

 

يادجلة اوفرات العذب بيه الماي

نجمه وي گمر وامطرزه الجرفين

 

جوري الورد نعناع ويه الياس

يتمايل غنج ويعطر الجنبين

 

يتهاده البلم محله العتابه اوناي

والنسمه سـِـحر واتغازل الخدين

 

والطين الحمر ياقوت وي مرجان

حنـَّه للعرس وايحني بالچفين

 

تركعله الشمس تغسل ظفاير بيه

يا مي الفرات امن الجنه مي العين

 

ون گلبي جرح يبچيك هم تبچيه

والنخل انذبح ياحيف العنب والتين

 

خنجرهم غرز يذبح جمال البيك

يادجلة عشگ يا غنوة الطيبين

 

اهوار التراث العطش طگهه الموت

يادجله اوفرات الغدر واصل وين؟

 

أسمع للنخل والصوت وا ويلاه

حاني رگبته والفاس بالجنبين

 

ذله والمهانه اشلون تحمل ليش

يعراقي انتفض السكته للمسكين!

السكته للمسكين


حزيران / 2018

ســـــــــــتوكهولم



التعليقات
الرجاء من السادة القراء ومتصفحي موقعنا الإلكتروني، الالتزام بالحوار البناء وآداب وقواعد النقاش عند كتابة الردود و التعليقات. وتجنب استعمال الكلمات النابية أو الحاطة للكرامة الإنسانية، فكيفما كان الخلاف في الرأي يجب أن يسود الاحترام بين الجميع... مع كل الإحترام والتقدير إليكم من إدارة موقع منارة الشرق للثقافة والإعلام.