إلى المتظاهرين اهديها | بقلم الشاعرة: ميسون نعيم الرومي - منارة الشرق للثقافة والإعلام

إلى المتظاهرين اهديها | بقلم الشاعرة: ميسون نعيم الرومي

إلى المتظاهرين اهديها | بقلم الشاعرة: ميسون نعيم الرومي



بصرتنه اهتفت عاشت الحريه
انهض يا شعب ثورتك شعبيه
***
بصره اوكربله والكوت والسده
شبابچ هالنهض للظلم يتحده
***
يابابل زلم يا صوتهه الهادر
شبابك حنته من ثورة الثائر
***
ثورتك يا شعب كل ثورة الفقره
نتحده الظلم وانساند الثوره
***
بغداد الرشيد او حضن كل ثاثر
خل يسمع ابصوتچ حاكم اوجائر
***
ابذيقار ثوره والنجف ميسان
فاليحيا الشعب والموت للحيتان
***
فرصتك يا شعب انهض اوساندهم
شباب المنتفض هاليوم ثورتهم
***
وين ابن الرمادي الموصل الحدباء
هيت اوعانه راوه وبن سامراء
***
يا ام العراقي .. هلهلي الإبنچ
(سعد) ثار اورضع صرخاته من صدرچ
***
منريد القياده الجتــّي من ايران
افيون اوحشيشه اتوكل الشبان
***

اطلع ياشعب لتگول شعليه
-(الخضره)صفت بيت الحراميه
***
رجـّـع ثروتـك واتعيش متـنـَعـِم
(حاسب) كل سياسي اوحاسب وامعمم
***
عتموا ع الخبر حفنة قيادات
وابدمنه بنوا كومة محطات
***
ياابـن العراق اوثـورة العشـريـن
ثور اعله الظلم والظالم من اسنين
***
اجونه امن العدم حفاي نهابه
عَ الكرسي اگعدوا كومة الچذابه
***
محطات الإذاعه ساكته اشمالچ
محروگ الشعب ذكريه باخبارچ
***
نفطنه اوماينه متـْحـَـكـْمَه بي ايران
حكومتنه دغش يا كومة الغمان
***
افتوا يالمراجع هالحكم باطل
شبابك يالعراق اوع العمل عاطل
***
معروف العراقي صاحب الغيره
ما يقبل حنطته تاكل اشعيره
***
بفلوس الشعب سووا محطات
محتفلين بيها والشعب مات
***
عراق الخير شعبه منهتك جوعان
اويلي اعليه.. يتحسر البيتنجان
***
كاتلهم (الهبري) اللبس عَ الموده
اتسلطوا علينه .. ساعة السوده
***
يا دجلة الخير او هالفرات اوياك
يا شعب العراق الثورة تترجاك
----------------------------------------------
14/ تموز/2018
ســـــــــــــــــــــتوكهولم



التعليقات
الرجاء من السادة القراء ومتصفحي موقعنا الإلكتروني، الالتزام بالحوار البناء وآداب وقواعد النقاش عند كتابة الردود و التعليقات. وتجنب استعمال الكلمات النابية أو الحاطة للكرامة الإنسانية، فكيفما كان الخلاف في الرأي يجب أن يسود الاحترام بين الجميع... مع كل الإحترام والتقدير إليكم من إدارة موقع منارة الشرق للثقافة والإعلام.